LsU  presentat sa Pimpa in sardo. di Servadore Serra

Sa Pimpa, sa catzedda curiosedda de Altan arribat a Bànari.Sa catzedda curiosedda a pallineddas rujas imbentada in su 1975 dae Frantziscu Tùlliu Altan, famadu pro sos disinnos satìricos in La
Repubblica e l’Espresso, como faeddat finas in limba sarda e pro sa prima bia arribat in Meilogu in sas comunas de Bànari, de Sìligo e de Bunnànnaru. Si incumìntzat mèrcuris su 20 de santugaine a sas 17.30 in s’àula de su Cussìgiu comunale de Bànari in pratza de Solinas in ue b’
at a èssere un’initziativa interessante e alligra de presentatzione de bator libritos de sa Pimpa  e in ue sos pitzinnos de sas iscolas ant a partetzipare in manera ativa.
S’initziativa, organizada dae s’ufìtziu de sa limba sarda de sa Comuna de Bànari, paris cun sa Fundatzione “Maria Carta” e sa biblioteca comunale, at a èssere presentada dae Diegu Corràine, editore de Papiros, Clara Farina, professora, e dae Juvanna Tuffu, responsàbile de s’ufìtziu de sa limba sarda.
 Bator libritos curiosos e belleddos in ue sa Pimpa imparat a sos minores sos colores, ma finas a contare e sas cosas de sa bida de cada die. E tando sa Pimpa est afainada cando imparat su sardu e lu faghet in una manera curiosa e colorada.
A pustis de l’àere bortada in sas limbas prus faeddadas de su mundu comente s’ingresu, s’ispagnolu e su frantzesu est istada bortada, a bandas de su sardu, finas in àteras limbas minoritàrias comente su ladinu e su friulanu. S’initziativa chi est parte de sos còmpitos de s’ufìtziu de sa limba sarda est pro sos pitzinnos ma finas pro sas famìlias, sos maistros e sas maistras e a totu sas pessones chi tenent in coro sa defensa de su patrimòniu linguìsticu nostru. Custu addòviu est sa parte finale de unu traballu in ue sos pitzinnos de sas iscolas primàrias de Bànari ant sighidu unas cantas letziones de limba sarda in ue sunt istados impreados sos libros de sa Pimpa in oràriu curriculare.
Cun custa presentatzione bolimus mustrare comente sa limba sarda si podet impreare in totu sos àmbitos e comente si podet fàghere didàtica in sardu cun ispàssiu paris cun unu personàgiu de sos cartones animados famadu e curiosu.
Su 25 de santugaine b’at a èssere sa presentatzione de sa Pimpa in Sìligo in su tzentru de agregatzione sotziale e in Bunnànnaru in su mese de santandria. Sas initziativas sunt fatas paris cun sa Fundatzione “Maria Carta”.