TRA STORIA E LEGGENDA

pag.17                                                                                                     

pag.1Sommario

Una die soberana…"saludu, saludu. Grascias siene a su Segnore".

Est beru chi ogni die est de Deus, pius de tottu cando b’est su saludu. Ma cussa de su vintunu de malsthu  de su trintanoe, pariat chi cheriat immentigare totus sas ateras. Su sole fit alsthu in su chelu mandhendhe una caluredha amantiosa, chi fintzas sos puzones  fint in recreu. In mesu a sas alvures  fioridas pienas de abes in trobagliu, isthaiant cantendhe milli cantos, dae su rusinzolu a sas calsdhoglinas, sas sorigheddhas ei su ciddhu, totu armizende a su propriu nidu, chie in sas pubuleas chie in sas mattas a segundu de sa natura issoro.  Deo puru aija cumpridu sos trobaglios de su manzanu e cumpare a fizu meu, su pius mannu,  mi che fija andhadu sutta a un avure etza de chelschu, ma sempre fozida che pitzinna, a miche passare un ischutta. Attesu s’intendhian sas boghes  de su messaiju fattende su eranile pro assoliare sa terra in s’isthiju, chi poi at’aere bavatadu a sas primas abbas pro semenare su laolszu.
-”Ah!! purpuri!!! Olstha su ò!!!” sa cadrijas ses lassendhe?. 
Sos tzoccos de sas bistrales de sa zente fattende linna pariant fusiladas abhelstas in chelu. Unu ischimuzu a pinna de muru ti faghiat bolsthare s’oju, candho pro unu, o un’ateru animale. Sa merula niedda che pighe, ei su furittu catziendhe issu puru pro sos fizigheddhos. Su tzilibriu sempre a briga cun calschi terrionca, si etaijat che fritza  subra a calschi sorighe o colora chi si fint assoliende. Gai cun sos pensamentos mios, mesu in su sole ei sa conca in s’umbra, e fizu meu  drommidu che un angheleddhu mi so ingalenadu sonniende a frades mios palsthidos in gherra. 
-"Oh ba!!!…. Ba!!….Curride, curride an' dhomo chi bo cheret giaija-". Su fattu a mannu, fit isalenendhe dae sa grande curridina e chena mi lassare mancu su tempus de m’ischidare fit palsthidu che fuette. In domo, sogra mia, tota pasida ma segura dei cussu chi fit fattende mi narat a chi essire in presse a biddha, a giamare sa mama 'e palsthu ca Frantzischa fit a proa a s’illierare.

 

da Sos Contos de foghile "una die soberana"saludu saludu grascias siene a su Segnore

 

 Frantzischa, muzere mia, fit' una bella femina, no pius tantu pitzinna ma ancora in folszas, poi de chimbe fizos, e sue sese approa a bennere. 
-“Ajò c'un babbu, pone sa seddha a su caddhu, deo peristhantu mi cambio su entone”-.  
Su caminu andhendhe e torrendhe pariat pius longu de sas ateras bolsthas. A s’andada fizu meu a groppera, e a sa torrada  invetze“mammai”, e deo a pè cun su coro in bula che lepere in saccu.
-”-Iperemus chi Frantzisca trattenzat…………Dae s’aiudu 'e dhomo, abbelszende sa jaga unu piantu, chi mi beleit su coro, e unu frittu, mancarri sueradu, in sa trae de s’ischina. 
-“Deu Santu e Beneittu cun totus sos Santos dessu Paradisu e it’ esthe-"? « pregadi ene, pregadi ene ».
 Sogra mia a muncaloru in conca cun sa falsdhitta insambenada, lesthra che loddhe in fua,  mi ponzeidi unu pannu 'e lana totu ammorotuladu in bratzos. 
-“Bae a faca dessa fogulaija e bettali sa fressada”-. 
 E in d’unu e in tantu, umpare a “mammai” ch’intreit in s’appusentu. Fia a trimuleddha ischovachende cussu pannu, ca una carigheddha ancora biaita e fadigada cun sos ojos ancora tancados s’accereidi a fora. Un atera grascia de su Segnore s’ aggiungheidi a sa familia.  
-“Essi unu cicchette a babbu fizu me!!!! "........... "E bufadilu tue puru, chi como ses già mannittu”!! 
Totu a un’ intasada pro mi toccare su coro e un ateru a li leare sabore.
-”pregadi ene, pregadi ene “-
 Sogra mia accerada in sa janna de s’apusentu jughiada un ateru pannu ammorotuladu cun d’una cuntentesa chi su risu de sa ucca tota isdentigada l’andaiat da un’orija a s’atera; sa falsditta piena 'e sambene comente chi esseret isthada isthellende. 
-“Sos fizos sunt grascias de Deus, e cun d’unu mascittu b’aijat puru una femineddha ». 
No ischia a riere o a pianghere, e in pag'ora totta sa pinnetta si fit piena de sos ateros fizos allegros che cicciri, currende intundu a sa fogulaija e riende.
-”Pone un ateru cichette a babbu fiza mi!!!!. "-
  Dae su ighinu   fint bennidos a visita ei sos isthranzos sunt sempre sos benennidos. 
-“A chentu, a chentu!!! Dies comente 'e oe, cun saludu e cuntentesa”.
Sa suffatta  fit piena de caligheddhos boidos, ma sos pius, pienos, e andaijat e torraijat dae intro a fora e poi torra a intro.
-”Saludu compa!! A los bider mannos e cojuados!!  Saludu, saludu. 
-“Aioe, truva a intro a s’appusentu cun totus sos pitzinnos”-mi narat sogra-. 
In d’unu e in tantu totus sos pius mannitos inghiriados, e sos pius minores subra, in pees de lettu, e Frantzisca totta bella ipizada e profumada cun duas animeddhas attaccadas in titta suende, e drommidas che duas paschareddhas. Deo mi sentia subra a sas nues pro sa cuntentesa, ancora cun d’unu caligheddhu in manu guasi boidu.
-”Frantzì gia mi l’as fatta s'improvvisada!!!”
 Frantzisca juighiat una cara bianca ruja, che pitzinna in fiore: gia fit bella muzere mia, m’aijat a su mamentu risparmiadu trobagliu pro faghere fizos a unu a unu. Fora aijant comintzadu a ballare su ballu tundu a sonette ei sas suffattas andaijant dae intro a fora tottas pienas de caligheddos cale boidos e cale pienos.
-”Saludu, saludu!!!”. 
Su sole siche fit caladu ei sa die fit intirinende. Sos puzoneddhos si fint preparande  a che passare su notte e deo puru istraccu mi so etadu in sa odijeddha a pes dessa fogulaija, puru ca pruite sa conca mi parijat un bugnu de abe. Ite die soberana.