TRA STORIA E LEGGENDA

pag.34                                                                       

pag.1Sommario                              Unu manzanu de carrasciale 

Unu manzanu de carrasciale (comente totu sos ateros manzanos), giaiju tou, chito e a bon'ora m'ischideit:

-"Aioh!! Juannè!!Pesa! Chi est ora de ch'essire".
-Su rumore de sas bottes russas e de sas corrias, su lumminu frighende in s'iscatula e una lugareddha minuda minuda, dessa lampana a carburu dae s'apusentu.

-" Lea a Giaraluna chi andhamus a binza"- Giaraluna fit sa craba chi m'abaidaijat cun ojos de lasthima.

-"Gia nd'as de presse", pensaija deo, arrinzende sas dentes comente chi esseret isthada guppa de sa craba.

Dae avescher sa dije e fintzas a s'intirinada ch'istaimus fora, fattende cando una, cando s'atera cosa. Sos tempos fint diffitziles pro tottu; giaiju tou fit rientradu dae sa gherra manna e cun sos fizos pius mannitos devijat pensare a dare a mandigare a totta sa familia. Sas zoronadas fint a pagu a pagu, e puru sos pius riccos tendijant a giamare paga zente. S'aera fit isteddhada ei sa luna piena, allughiat su caminu su tantu pro no trambuccare in mesu ae cudda saurra cun sa campagna nieddha chei sa tura. Appena intrados in su tirighinu chi che falat dae Santu Juanne a su Demaniu, duas umbras mi feteint belare su sambene. B'aijat zente meda in giru intr'e iddha, pius de su solitu de ogni dije.

-" Intesu azis compare Fo!! ite disaccatu b'ant fattu in Cul'è Muru.Hant mortu una familia intrea".

Tiu Antonè fit un omineddu de pagu contu, gai gai, unu pagu dulche, amus a narrer de paga cunsistentzia de cumprendhoniu. A bon'ora fit andadu a culu e muru pro fagher sa zoronada, ma aijat apidu su mortoriu. Nde fit pigadu a biddha in d'unu alenu a dare sa notiscia fea cun tantos mortos. Deo fia ancora minore e tirende sa fune de Giaraluna ponija fattu a giaiju tou guasi ponzende sos pees in sas istigas suas. Ogni upa mi pariat unu dimoniu, sas cosas pius feas c'aeret potidu pensare. Che fimus in fundu a su tirighinu a candho dae s'iscuru tronat una oghe:

-"Bonadie Foè!!"

-" Bonadie a tie Pitze' No ti l'hat fatta s'ora, chi ses gia recuende!"

-"Intesu l'has ite b'ant fatu in Cul'è Muru?" E ite crees ch'inde sunt bennidos dae Roma?

Solu daeboi e pagu tempus sa giustiscia feteit su dovere, e tres "bravos omines" che fineint in galera cun s'ergastole.

Arrejonende cun giaiju tou, mancarri minore mi domandei comente aijat fattu PitzeCa  si fit recuende dae sa Pala 'e Fiore a ischire dei cussas mortes chena aer ancora idu a nijunu chentza esser arrivadu mancu a biddha?