TRA STORIA E LEGGENDA

TRA STORIA E LEGGENDA

Su primu ballu.

Si viviat in campagna, in sos Renalzos ma, aimus puru sas domos in biddha in sa carrela chi la giamaijant "via delle balle". Tando sos divertimentos fint pagos e nuddha, si no in calchi festa cumandada, guasi sempere pro connoschere atera zente noa. Aija jompidu sos degheott'annos e fimus pigadas a bidda cun mama in tempus de carrasciale. Ande..., una tia mia, raida manna, mi proponet de Nos caratzare e andare a su sotziu. Dadu chi fit a andhare cun tia, sorre de mama, mi deini su permissu. Pro mi caratzare unu calzone de omine mannu, unu entone e unu berretto mesu male andadu: istratzuladu e sueradu. Pro tia chi fit raida e meda pius manna 'e me, non si buscaijant sos trastos justos. A cando mama, fattende memoria, s'ammentat de aere in domo "s'ispoglia pro sa morte" de tia Laura bitttichesa chi, sa colza in su chelu che siat, fit povera de sos pius poveros, chena aere mancu unu logu a s' arribbare cuss'ispoglia. Ne nada e ne fatta si estit puru tia chi mancarri raida aijat sa petza de tia Laura e, Nos incaminamus a su primu sotziu. Deo no mi fija mai sonniada una cosa gai bella: bad'aer' apidu nessi vinti o trinta pessones in su sotziu de tiu Lumbalsdu vicinu a s'isthradone. Guasi tottu omines, e pagas mascherinas chi podiant esser fossi fossi feminas. Ca sa legge tando proibiat, puru cun sa cundenna, a sos omines de si caratzare, pruite cun cussa iscuja podiant cummitter calesisiat dellittu.
- Boh!!!! a mije mi parent mascios!! e malos puru. Abba!! a ratz' 'e curumos mannos..... e isthraosthumene!
Tra su bulsdellu de su sonu ei sas boghes de sos imbreagos mi tremaijant sas ancas che fozas de canna.
-Aijoh!! Giuannè chi andhamus a su sotziu de Bocceo!!- Mi feteit tia- In que fossi fossi b'at zente pius tzivile.
Unu, su sonadore cun su sonu, che fit in punt'e unu carradellu, duas coppias de omines ballende umpare e ateros paritzos cottos che pipa in d'unu chizolu.
-Mi mi!! belle mascherine a buffet! -si ponzeit a ticchirriare unu in s'intrada appena no bideit arrivende- E ite feminas!! Cussos sunt pius mascios de a tie!!!!
-Aijo aijo! Giuannè!!- torra tia Juannanghèla- in que mancu b'intramus! Aijo a su sotziu de tiu Minniu.
Cussu, che fit pius subra 'e piatta, e fintza ai como deo mi fia divertende chi mai. "- Aih mama mia totta cussa zente...e chije nd'aijat mai idu tanta, totta umpare!! -Ei sos sonos ei sos risos dessa zente che lo giughija in tzelembros...mi doliat totta sa meragna; ma fia gai cuntenta e felitze.
-Tedeh!!! duas bella mascherinas chi pius bellas fint'annos meda chenache nd' intrare!!! Avantzade e benennidas siedas e bonu divertimentu-.
Su logu fit iscurosu cun duas lampadinas de pagas candhelas e unu fiagu de inu e de suore chi si misciaijant a pare.
-Aijoh!!! sas mascherinas, intrade a sa dantza!-
Deo no ischia ballare a nuddha. Mai b'aija proadu ne cun feminas ne cun omines. Ma pro su ballu tundu bi cherijat pagu inzegnu e tando a manu tente, comente in mesu a s'alszola. Calecunu tenteit de allungare sas manos, ma tija Juannanghèla l'allungheit unu ciaffu chi pro sa potentzia, s'ateru bi lu deit una mesina arrumbada subra a unu carradellu.
-Ih!! Deus nde ardet!!! E ite feminas!!! cussos sunt mascios malos.Giamade sa folsza dae quastheri-.
Ne nada e ne fatta daeboi 'e pagos minutos, mih!! sos carabineris chi Nos affrontant nendhe: -Favorisca le generalità! Si faccia riconoscere!
Nos che tzacheint in dh'unu apusentu ue bi tenijant su inu ei sas bibitas. S' appuntadu controlleit sas manos de ambas duas. Pro la distinghere: de omines o de feminas?
- Brigadiè a me mi parono duos omines ivece di donne!!!Ca le mani sono piene di galli!-
Sa manos de tija ei sas mijas puru, fint abituadas a sos trobaglios dessa campagna. Tia, pruite agiuaijat a tiu Gosamu, e deo a babbu e a mama in domo e in su laore. Duccas no b'aijat meda differentzia dae cussas de sos omines ma abbastante de cunfundere s'appuntadu ei su brigaderi.
- Favorite ulteriore riconoscimento togliendo le maschere!-
E ite isgonza como mi devijant bider in cara pro forza. Ma s'appuntadu appena alszada sa mascheriglia ideit sa laras ei sa pinnas de nares chi seguramente li paffeint de feminas....
- Signor brigadiere essi sono care di femmine e non di maschi-.
Torramus tottu in sa sala pius manna, ue b'aijat unu silentziu 'e campusantu,ei su brigaderi neszeit:
- Tutto a posto esse sono donne e potete continuare le danze-.
Peristhantu sa gana mi fit passada ei su coro chi che lu jughia in bula mi torreit gammu su tantu de Nos che torrare a dhomo nostra. Assuconada ma cuntenta.