In tempus passadu, allontanu meda, b’aijat una familia ue vivijant doighi fizos : Bennarzu, Frealzu, Malsthu, Abrile, Maiju, Lampadas, Triulas, Austhu, Cabidanni, SantuAine, Sant’Andria, e Nadale. Babbu Soberanu a d’ognunu de a issos deidi unu  tempus giusthu, pro l’impreare comente mezus esseret isthadu pro su enidore de s’umanidade. Ma s’ischit bene ch’ in d'ogni familia bi naschent anzoneddhos e canes. Ognunu faghiat su chi fit in s’impidu sou a segundu de s’isthajone in favore a sos cristhianos e a sa natura chi esseret isthada dessa piantas o dessos animales. Gai  comente si fint impignados cun Babbu Mannu a comintzu. Bennarzu fit de mal’impidu e faghiat temporadas malas a s’ispissa, contra a d’ogni essere vivente.
-E a ue andhas crasa a pasthorigare ? dimandhat Bennarzu a su pasthore.
-Appo andhare a sas baddhes chi b’at pius appoggiu!-
-Cumandho abba e bentu e temporadas de nije in baddhe!- narat Bennarzu alszende sos bratzos a su chelu. Su pasthore chi connoschiat bene dae sos mannos suos, giaijos e bisaijos, su chi aliat cussu mese, sich’andhaiat a tutt'atteru logu.

- Ello non bi ses andhadu deris a sas baddhes?
- Ellea? 
Eeehh !!! E craas' a ue andhas ?
- Ih! Apo andhare a sos muntijos…
- Cumandho abba e bentu e temporadas de nije in in sos muntijos!-
Sa merula jiara che nije, chi si fit abbilstha dessu onu pasthore approffettaiat dessos seberos suos e gai faghiat issa e, sicche passaijat bona parte dessa dije, cantendhe e fattendheli cumpagnia.

Peristantu Bennarzu fit finende sa dies suas e s’abbizat chi su pastore aiat bonu indellettu e chi resessiat a sicche la francare guasi sempere. Tando andhat a agattare  su frade Frealzu e li domandat de li prestare calecuna die pruite sas suas no li basthaiant a che "futtere" su pasthore. Frealzu pro esser isthadu bonu o maccu a segunda de s’intendimentu de ognunu chi legget li donat duas dies resthendhendheli  a issu solu vintiotto.
Bennarzu prima chi su frade s’esseret pessadu ticchirriat:

-    - Cumando abba e bentu e temporadas de nie in baddhe e in sos muntijos-
Su pasthore non creijat a sos oijos suos pro sa temporada mala in tott’ue. A pinna ‘e unu muru sutta a una matta ‘e chessa custhrintu a s’iscaldhire solu cun s’alenu sou, abbaidaiat s’ama de sas arveghes suas, cun oijos lagrimosos.

Sa merula, peristhantu sicche fit postha in punta a una pinnetta covaccada a teria e a ude, ue, nd’ essiat unu pagu ‘e calura dae sa fogulaija, ancora cun sos tittones atzesos. Su fumadigu la fetteit totta nieddha che pighe. Dae sa dije dei custhu fattu Frealzu at vintotto dies ei sas merulas diventeint nieddas pidigas, mentere chi Bennarzu est resthadu unu dessos frades chi faghent pius de tottu tribulare sa zenìa umana ei sos ateros viventes.