Su Jogu.                   

 de Maria Frantzisca Unale  

Candho fia minoreddha, unu de sos jogos chi faghia pius a s’ispissa, cun frade meu, pius mannu de me de tres annos, fit a faeddhare in sardu. Isthaimus in domo de giaija e mentere chi issa faghiat sas cosas de dhomo, nois in d’unu chizoleddhu cun duos banchittos e duas cadreas giogaimus a compare e a comare. Nos seberaimus sos nomenes ei sos sambenados de zente connota ma, puru isthevinzos ch’intendhiaimus in domo dae sos pius mannos. Giaija mi faghiat una pupija de isthratzu, cun tapulos avvassados de furesi o de frusthanu, e mi la cosiada cun filu de carrucciu o de ispagnoletta.

Giaiju s’appentaiada cun frade meu a li faghere su ju, cun su juale ei su carru, leende duos caos de triguindia. Frade meu carrulaijat pedra e, carrucaijat laore, deo, daija a suere a sa pupija e li cantaija, su “duru duru”, pro che la fagher drommire. 

“ -….duru duru duru siat,
sa campanas de cheija
la toccana su manzanu.
Su puddhu cagliaritanu
Sa mela campidanesa…. 

-Eh! Compà e occ’annu annada ona esthe?-

-No b’at male, grascias a Deus! Ello, sa pitzinna no sicche cheret drommire?- 

“….Candho su coro si pesat
Non lu idu e no lu tocco.
Cariasa e barraccocco
B’aijat in binza mia
Duru duru duru siat. » 

Fit sa mantessi cantone chi nos cantaijat giaija, pro nos che drommire a ora ‘e mesudije. Ca pruite si no, passaijat sa mama de su sole umpare a maria lentolu e, sicche jughiant sos pitzinnos chi acciapaijant ischidados.

Deo minde ammento como puru dei cussu logu moddhe e seguru, chi fit sa coa de Giaija. Micche drommija cuntenta in milli sonnios de gloria, umpare a frade meu.