S’iscobiu de sos cojuados noos. Indice Contos de Foghile>>>>

Sos cojuados noos innanti de bessire iscobiados in sa 'idda, innamoraiant a cua, idendesi calecuna bolta a missa o in festa cumandada, in sa protzessione, o su sero a tardu cando cantaiant in sardu sos cantadores in garas liberas o a pannu, oburu cando bi fint sos poetes. Una ojada e bastat, chentza sind’ abbizare sos mannoso puru iscampullitende in carchi bicu affaca a domo o andende a carchi cumandiscia. Fit a proa a sind'acurtziare cabidanni ei sa festa de Santa Justa. In cussa occasione sos cojuados noos aproffetaiant de essire in bidda e in sa festa a cara de sa zente. Babbu bostru andeidi a sue tiu Chiccu Cossiga pro si fagher prestare s’ebba seletzionada, sa mezus de idda, e cun sa sedda de sa mezus occasiones ei su manteddu tessidu a telarzu a sa sarda pro sa gropera, ue deviat setzer deo. Semus partidos de bon’ora aveschende a su manzanu: Giuannantoni cun Paulina madrina mia, in mesu deo cun babbu tou, e addaesegus Toeddu cun Pedrutza, ambos pius mannos de a nois. In cunsideratzione chi fimus sos pius giovanos no tocheit su portu de onore chi fit in mesu, chei su mese de maju. Ande importantzia chi nos daimus deo e babbu ostru, a caddu a un ebba seletzionada, impreada solu a fagher leva comente fattrice, fit comente chi oe esseremus andados subra a una Ferrari pro narrer una macchina de lussu.

Peristantu in caminu abbojaimus zente a pe e a caddu, fintzamentra in carru a boes e in calesse, e tottu nos daiant sos augurios, sos pius a nois chi fimus sos pius giovanos. Comente semus arrivados a sa cheja de sa Santa babbu tou at dadu unu colpu de isprone a s’ebba chi s’est inchiberada comente una estiga, c’at brincadu cuddos duos pius betzos e non semus presentados in piatta de cheja cun s’ebba frenediga a ojos impabirados chi non bidia s’ora de non de bider in terra, ca babbu tou pro nos dare pius importantzia l’aiat tenta a isprone e a morsu semper in tira. Sa zente s’est dada orta, cale attacada a muru cal’atera aintro de cheja, ca pruite s’ebba ferrada a nou in sas pedras in terra catzaiat fogu. Tra  abbratzos e istrintas de manu de amigos e parentes nos comporeimus bonu turrone ca non fit d’ogni die chi non de gosaimus dei cussu, e ateros lilcalsdumines. Fizos mios caro in d’unu e in tantu, comente bos lu so nende, s’aberin sos chelos cun tronos e lampos e abba comente Deus la podiat cumandare. E sigomente Santa Giusta nois la chircamus pro s’abba, l’amus ringratziada tottu cun sos cantos de sos gosos ca s’abba in cussa istajone est unu bene de Deus pro sos laores. Non semus iffustos  comente e tottu, ma non nos semus lamentados, antzis l’amus leada comente una benedissione pro unu bonu benidore.