Tra Storia e Legenda

home>>>

Contos de foghile>>>

 

Sas dies de sa Merula (dae unu contu antigu de foghile)

merula.jpg (143921 byte)

 

 

 

In su tempus passadu, allontanu meda, in d’unu logu mannu chentza lacanas perunas,b’aiat una familia ue viviant duos isposos cun doighi fizos. Issos si naraiant: Bennarzu, Frealzu, Martu, Abrile, Maju, Lampadas, Triulas, Austu, Cabidanni, Santu Aine, Sant’Andria, e Nadale.

Babbu Soberanu cando aiat fatu su mundu, e totu sas ateras criaduras las aiat ispartas in sa terra in s’abba e in sas aeras, feteit puru sos meses de s’annu e a d’ognunu dea issos deit unu  tempus giustu, pro l’impreare comente mezus esseret bistadu pro su ‘enidore de s’umanidade. Ma s’ischit bene ch’ in donzi familia bi naschent anzoneddos e matzones. Ognunu faghiat su chi fit in s’impidu sou a segundu de s’istajone in favore o contra a sos cristianos e a sa natura chi esserent bistadas dessas piantas o dessos animales. Gai   comente si fint impignados cun Babbu Mannu a comintzu de ogni cosa passaiant su tempus cando a giogu cando a briga. Bennarzu fit isfediadu e, de mal’impidu e faghiat temporadas malas a s’ispissa, contra a d’ogni essere vivente.

-Eh, a ue andas cras a pastorigare ? dimandat Bennarzu a su pastore. A ue che giughes s’ama de sa barveghes?
-Apo andare a sas baddes chi b’at logu apogiosu!- Rispondet su pastore.
-E tando cumando abba e bentu e temporadas de nie in badde!- narat Bennarzu altziende sos bratzos a su chelu. Su pastore chi connoschiat bene dae sos mannos suos, giajos e bisajos, su chi baliat cussu mese, intamen de andare a ue aiat nadu, sich’andaiat a tutateru logu, mezus in monte.

AL_PASCOLOa.jpg (17644 byte)

-         Cabulendeche sa die, Bennarzu s’abizat de sa fata, e intopende su pastore, li dimandat:
-Ello ! non bi sees andadu deris a sas baddes? Eeehh !!! E craas a ue andas ?

-         Ih! Apo andare a sos muntijos. Che li bessit a su pastore trassosu.

-         Cumando abba e bentu e temporadas de nie  in sos muntijos! Narat Bennarzu istringhende sas dentes-

Peristantu sa merula, chi Deus Babbu aiat fatu giara che nie, si fit abista dessu bonu pastore e, aprofetaiat dessos seberos suos pro siche bolare in su matessi logu ch’issu   andaiat, sighendelu passu passu, e, siche passaiat bona parte dessa die, cantende e fatendeli cumpagnia.

Gai chi passant su tempus e Bennarzu fit finende sa dies suas e s’abbizat chi su pastore aiat bonu intelletu e chi resessiat a siche la francare guasi sempere. Custu no lu podiat baliare, e tando andat a agatare a su frade Frealzu e li dimandat de li prestare calecuna die pruite sas suas no li bastaiant a fagher sa buglia a su pastore. Issu fit gai:isfediadu!  Frealzu pro esser bistadu bonu o macu a segunda de s’intendimentu de ognunu chi leget l' indonat tres dies de sa suas e, a issu nde li restant solu vintiotto.

merulamerlo.jpg (27070 byte)

Intamen de nde la fagher finida, sas ultimas tres dies, amus a narrer su vintinoe su trinta ei su trintunu, Bennarzu prima chi su frade s’esseret pessadu tichirriat:

-    Ambas duas dies su vintinoe ei su trinta e puru su trintunu, cumando abba e bentu e temporadas de nie in d’ogni badde e in totu sos muntijos-

Ne nada nen fata, s'altziat custu tempus malu cun bentos fortes e nues banduleras pienas de abba e de nie chi ogni criadura nde fit male assuconada e atriminida.

Su pastore non creiat a sos ojos suos pro sa temporada mala in tott’ue. Tando che ponet s’ama de sas barvegheghes in su pasciale a pinna ‘e unu muru, e suta a unu mascione mannu  de chessa, isfritulidas e famidas, s’una atacada a s’atera pro si tenner in afianzu e lis betat sa sida.

Issu  custrintu a s’iscaldire solu cun s’alenu sou, sich’intrat aintro unu barracheddu ue, in su tempus bonu, s’aiat fatu unu remiarzu de linna fine e russa, e atzendet su fogu in sa fogulaja. Sa merula abbaidende su fatu no ischiat ite fagher e no epende coragiu de siche intrare aintro cun su pastore, siche ponet in punta a su barracu  covacadu a teria e a bude ue nd’ essiat unu pagu ‘e calura dae sa fogulaja ancora cun sos  titones atzesos, ma puru su fumadigu chi la feteit tota canta niedda.

 Dae sa die dei custu fatu Frealzu hat vintotto dies ei sas merulas diventeint nieddas pidigas, mentere chi Bennarzu est restadu unu dessos frades chi faghent pius de tottu tribulare sa zenia umana ei sos ateros viventes, in ispessia sas ultimas trees dies chi dae tando li narant, sa dies de sa merula e, tando at a essere chi su benidore de su Beranu chi siet de bonu alenu e ricu de onzi bene de Deus.